బీజేపీ ముఖ్య నాయకుడే అడ్డుకున్నారు... మాజీ మేయర్ ధర్మపురి సంజయ్

మున్నూరు కాపు కులస్థులంతా ఐక్యంగా ఉండి అభివృద్ధి కోసం పాటుపడాలని మాజీ మేయర్, మున్నూరు కాపు సంఘం జిల్లా అధ్యక్షుడు ధర్మపురి సంజయ్ అన్నారు. నూతనంగా ఎన్నికైన నిజామాబాద్, బోధన్, ఆర్మూర్, భీమ్గల్ లకు చెందిన మున్నూరు కాపు కార్పొరేటర్లు, కౌన్సిలర్లను జిల్లా మున్నూరు కాపు సంఘం ఆధ్వర్యంలో ఆదివారం సన్మానించారు.అయితే ఈ సన్మాన కార్యక్రమానికి బీజేపీ కార్పొరేటర్లు డుమ్మా కొట్టారు. దీనిపై సంజయ్ ఆగ్రహం వ్యక్తం చేశారు. ఈ సందర్భంగా ఆయన మాట్లాడుతూ.. కులస్తులందరూ ఒక తాటిపైకి వచ్చి ఒకరినొకరు సహాయ సహకారాలు అందించుకోవడమే కార్యక్రమ ముఖ్య ఉద్దేశం అన్నారు. కానీ కొందరు బిజెపి నాయకులు వారి స్వార్థ ప్రయోజనాల కోసం ఆ పార్టీ జెండా మోసిన మునురుకాపులకు తాను తలపెట్టిన ఈ కార్యక్రమానికి రావాలని ఉన్నప్పటికీ కూడా బిజెపి అగ్ర నాయకుల ఆదేశాల మేరకు రాలేకపోయారని ఆయన అన్నారు. వారిని ఆ పార్టీ అడ్డుకున్నప్పటికీ ఆ పార్టీలో ఉన్న మున్నూరు కాపు కులస్తులందరూ మా హృదయాల్లో చిరస్థాయిలో నిలిచిపోతారని అందుకే బిజెపి పార్టీ నుండి గెలిచిన కార్పొరేటర్లు కౌన్సిలర్లకు ఖాళీ కుర్చీలలో వారి పేరు రాసిపెట్టి సత్కరించినట్లు ఆయన అన్నారు. ఇకనైనా బిజెపి నాయకులు కులమత విద్వేషాలను మానుకొని అందరూ ఒకటే అనే భావనతో ముందుకు నడవాలని ఎన్నికల సమయంలో రాజకీయాలు చేయాలే తప్ప ఎలాంటి రాజకీయాలకు స్వలాభం కోసం తాను చేపట్టే ఈ కార్యక్రమానికి వారు అడ్డుకట్ట వేయడం సరైన చర్య కాదని ఆయన పేర్కొన్నారు. కొందరు కులాన్ని మనుషులను విభజించాలని చూస్తున్నారని, కానీ తాము మాత్రం డీఎస్ అడుగుజాడల్లో అందరినీ కలుపుకొని పోవాలనే చూస్తున్నామన్నారు. కొందరి నాయకుల స్వార్థ రాజకీయాలకు అమాయకులు బలవుతున్నారన్నారు.