దేవీప్రసాద్ సార్... ఒక చిరునవ్వుల సంతకం! – దేశపతి శ్రీనివాస్ భావోద్వేగ రచన
నేను డిగ్రీ చదివే రోజుల్లో 'మరసం' పనుల మీద సిధారెడ్డి సార్ తోని కలిసి మెదక్ కు పోయినప్పుడు మొట్టమొదటిసారి దేవీప్రసాద్ సార్ 'ఆత్మీయ స్పర్శ'కు గురయ్యాను. అప్పటినుండి ఇప్పటిదాకా ఆ ఆత్మీయ అనుబంధ స్పర్శ అంతే తడిగా అట్లనే ఉంది. ఇగ లక్ష్మక్క గురించి చెప్పాలె... ఇంటికి వచ్చే బుద్ధిజీవులు, కవులు, ఉద్యమకారుల పాలిట ఆమె నిజంగా 'అన్నపూర్ణ'. అక్క చేతి వంట రుచి చూసిన వాళ్లెవరూ మర్చిపోలేరు. దేవీప్రసాద్ సార్ సహచరిగా ఆమె ఎన్నో కష్టనష్టాలను ఓపిగ్గా భరించింది తప్ప, ఎప్పుడూ కొంచెం కూడా యాష్ట పడలేదు.
నిజాం కాలపు నిరంకుశత్వానికి ఎదురుతిరిగి, గుల్బర్గా జైలు గోడలు దూకి, కరెంటు తీగల మీద పడి, గాయపడినా కూడా ఉద్యమ బాట వీడని అజ్ఞాత యోధుడు గుండవరం రాధాకిషన్ రావు గారి వారసుడు దేవీప్రసాద్ సార్. ఇప్పుడు 90 ఏళ్ల వయసులో, కొంచెం డిమెన్షియాతో బాధపడుతున్న మాతృమూర్తి విజయలక్ష్మమ్మ మౌనంలో ఎన్ని ఎన్ని పోరాటాల కథలు, ఎన్ని విషాదాల వ్యథల జ్ఞాపకాలు అణగిపోయి ఉన్నాయో ఎవరికి ఎరుక? ఆ ముఖం మీద ఎప్పుడూ అనంతమైన 'అమ్మప్రేమ'నే వెలుగుతుంది తప్ప, ఆనాటి బాధల గురించి ఆమె ఎప్పుడూ నోరు విప్పి చెప్పలేదు..
వాళ్ల ఇద్దరి చైతన్యం ఆయనకు వారసత్వంగా వస్తే దాన్ని రాటుదేల్చింది మాత్రం పెద్దపల్లి ఐ టీ ఐ. ఆ చారిత్రాత్మక విద్యాలయం చల్లిన బీజాలు పుష్పించి ఫలించాయి. మెదక్ జిల్లాలో విప్లవ చేతనను విస్తరింప జేసే దోహద క్రియను తన చేత జరిపించాయి.
టీఎన్జీఓల యూనియన్ క్యారెక్టర్నే మార్చేసి, దాన్ని ఒక పవర్ఫుల్ ఉద్యమ సంస్థగా మార్చడంలో సార్ పోషించిన పాత్రను మర్చిపోలేము. స్వామిగౌడ్ - దేవీ ప్రసాద్ ల 'ముచ్చటైన జంట' ఆనాడు తెలంగాణను ఎట్ల ఉర్రూతలూగించిందో తెల్వనిది ఎవరికీ ? మేధావులను, కళాకారులను టి ఎన్జివో సంఘంతో అనుసంధానం చేయడంలో ఆయన చూపిన పనితనం అసామాన్యం.
కేసీఆర్ ఆయనను ఆప్యాయంగా 'దేవీ' అని పిలుస్తడు . హరీశన్న, కేటీఆర్ లకు కూడా ఆయన అంటే బాగ ఇష్టం, మర్యాద.
తనకు మంచి 'సెన్స్ ఆఫ్ హ్యూమర్' ఉంది. రాజకీయాల మీద, వ్యక్తుల విపరీతాల మీద వేసే వ్యంగ్య బాణాలు మస్తు చమత్కారంగా ఉంటయి. అయితే ఆ 'చణుకులు' ప్రైవేట్ సంభాషణలల్లనే కాకుండా స్పీచులల్ల కూడా కొంచెం పలికిస్తే బాగుండు అని నా కనిపిస్తది.
66వ ఏట అడుగుపెడుతున్నా, సామాజిక జీవితంలో, వ్యక్తిగత జీవితంలో ఎన్నో ఎత్తుపల్లాలు, ఆనంద విషాదాలు చవి చూసినా... ఆ ఫేస్లో ఆ 'అలసట లేని చిరునవ్వు' మాత్రం అట్లనే వెలుగుతున్నది.
నిష్కామ కర్మ చేస్తూ నిత్యోత్సాహంతోటి ఉండటమే తనకు తెలిసిన 'సంజీవని విద్య'. తానంటే ఇప్పటికీ ఉద్యోగ కార్మిక మిత్రులకు ఒక ఉత్ప్రేరణ. ఉద్యమానికీ, పార్టీకి తాను చేసిన కృషికీ దోహదానికీ తగిన స్థానం ఇంకా రాలేదని అనిపించినప్పుడు బాధ కలుగుతుంది.
ఇవాళ హరీశన్న ఇంట్ల అలాజ్ పూర్ శ్రీనివాస్ రంగాచారి లతో కలిసి సార్ కు 'సాల్ గిరా ముబారక్' చెప్పినం.
హరీశన్న ఎంతో ప్రేమగా శాలువా కప్పి అక్కున చేర్చుకున్నడు. అక్కడున్నోళ్ళం అందరికీ ఆత్మీయంగా సంబురంగా అనిపించింది.
చివరిగా ఒక మాట... మెదక్ మిత్రులు శ్యామ్ సార్, సుధాకర్ సార్, భూపాల్ సార్, సిద్ధిపేట శ్రీనివాస్ రెడ్డి సార్, విక్రమ్ సార్... మీరంతా ఎక్కడున్నా వింటున్నారా?... మిత్రులమంతా ఒకసారి కలుద్దాం. పాత జ్ఞాపకాలను కలబోసుకుందాం. ఎప్పుడు కలుద్దాం? మీరే చెప్పాలి! హ్యాపీ బర్త్ డే టు దేవీ ప్రసాద్ సార్!
(దేశపతి శ్రీనివాస్,ఎమ్మెల్సీ✍︎....)
